Davao City – Gidala na sa Camp Panacan Station Hospital dinhi sa syudad sa Davao ang ubang mga sundalong samaran human nabuthan og landmine ug nakaengkwentro ang matud pa New Peoples Army kun NPA sa Brgy. Doles, Magpet North Cotabato nga milungtad og pulo ka minuto.
Sumala ni Civil Military Operations officer sa 19th Infantry Batallion Philippine Army, 2nd Lt. Angelique Taban atol sa interview sa DXDC RMN Davao nga duha ka samarang sundalo ang gidala sa Camp Panacan samtang ang laing upat gidala sa balay tambalanan sa Kidapawan.
Subay sa report sa 19th IB, giila ang mga samaran nga sila 2nd Lt. Rustine Barco, Cpl. Ronie Guitierez, Cpl. Roldan Parcon, Cpl. Shanon Obaldo, Private Rolando Bublao ug Private Dennis Andol.
Matud pa nga gikan ang maong tropa sa usa ka medical mission sa may Brgy. Binay, Magpet ug sa pag pag-agi sa may Brgy. Doles, gipabuthan sila og landmine ug gipamusil matud pa sa NPA ala 1:30 sa hapon kagahapong adlawa.
Sa karon, naglusad na sila og operasyon alang sa pagpangita ug pagkasikop sa mga responsable sa maong insidente.
RadyoMaN Renz Barbarona
