Davao Occidental – Nakarecover na ang unom ka mga pasahero nga na-angol human nadisgrasya ang ilang gisakyang UV Express van nga gidrayban sa usa ka Franklin Felisado, taga-Lupon, Davao Oriental nahitabo alas 4:20 sa kaadlawon didto sa Sitio Banate, Malita, Davao Occidental.
Subay sa imbestigasyon sa Malita PNP, naila sa Pangalan ang pasahero nga mao sila si Princess Cubillan, 18 anyos, estudyante, Quacken Alcordo, 27 anyos, Jame Rosalie Antulin, 19 anyos, estudyante, James Villacenso, 22 anyos, Aprilyn Oliar, 22 anyos, ug Jay Patrick Aquilar, hingkod ang edad.
Gipagawas na sa Malita District Hospital ang unom ka mga pasahero diin anaa na sa maayong kondisyon human matambalan.
Migula sa imbestigasyon sa kapolisan ang hinungdan sa pagkadisgradya mao ang pagkaputol sa axle sa maong van diin wala na nipaak ang brake ug wala na makontrol ug nidiretso pagkahulog sa kanal nga bahin.
Kasamtangang gikustodiya na si Felisado karon sa kapulisan ug maghulat kun adunay mo-file og kaso batok kaniya.
RadyoMaN Don Pulayao
