Davao City – Gipangsikop sa kapolisan sa Baguio PNP ug Buhangin PNP ang unom ka mga tawo nga dunay mga kaso human gipangsilbi ang ilang warrant of arrest sa nagkadaiyang lugar sa dakbayan sa Davao.
Base sa blotter sa kapolisan sa Baguio PNP, gipang-ila ang mga nadakpan nga mao sila si Jonnie Seno, 46 anyos, usa ka driver, dunay kasong less serious physical injury, Michael Jade Ubod, 20 anyos, dunay kasong kalapasan sa Section 2 President decree 1602, Andy Cabantao, hingkod ang edad, dunay kasong Act of Lasciviousness ug Samy Bernabe, 38 anyos, nga dunay kasong pagpatay.
Matud pa ang pagkasikop sa upat ka mga dinakpan kabahin usab sa gipatuman sa Baguio PNP nga Anti-Terrorist Clearing Operation ngadto sa ilang area of responsibility.
Samtang sa Buhangin PNP, napriso na karon sa selda sila si Roel Penanueva, hamtong ang pangidaron ug nagpuyo sa 81 Bread Village, Buhangin ning siyudad alas 10:00 kagahapon sa buntag sa kasong qualified theft ug si Philips Roy Lozano, 46 anyos, minyo, driver ug residente sa Manuel Salvador, San Antonio, Buhangin alas 11:50 kagahapon sa udto sa kasong Other Light Threats.
Ang korte nagrekumendar og 2,000 pesos nga bailbond alang sa temporaryo nga kagawasan sa mga akusado samtang magdagan ang ligid sa hustisya batok kanila.
RadyoMaN Don Pulayao / RadyoMaN Joel Viray
