BIRHEN SA KOTA
Ang labing karaang larawan sa Birhen dinhi sa Cagayan, mao ang Birhen sa Kota. Kini dunay kapin sa duha ka gatus ka tuig na ang panuigon. Birhen sa Rosario kini nga larawan, apan ginganlan dinhi sa ato ug Birhen sa Kota. Sama kini sa Birhen sa Rosario sa Manila nga ginganlan usab VIRGEN DE LA NAVAL.
Ang pag ngalan sa Virgen sa Rosario didto sa Manila nga Virgen de la Naval, nahitabo tungod sa usa ka dakung milagro nga gihimo sa Virgen sa mga kasundalohang Pilipinhon. Kaniadto, ang Pilipinas kanunay sulongan sa mga Olandes, kay ang kagamahanan sa nasud sa Olanda protestante man. Sa usa ka mabangis nga panagsangka sa gubat sa kadagatan, sa tuig 1646, naglisud nga maparot ang mga sundalong Pilipinhon. Sa ilang kalisud, misangpit sila sa Mahal nga Virgen sa Rosario nga luwason unta niya sila. Tuod man, gidungog ang ilang pag-ampo; kay sa makalima nga pagsulong sa kaaway, makalima usab sila maparot. Sukad niadto, ang Mahal nga Virgen sa Rosario ginganlan dayon, agig pasalamat kaniya, nga Virgen de la Naval – sa ato pa, Patrona sa mga sundalo ug sa gubat sa kadagatan.
Mao usab kita dinhi sa Cagayan. Dunay Virgen sa Rosario nga ginganlan usab VIRGEN SA KOTA. Sa unang mga katuigan,ang Cagayan kanunay gihulga ug gisulong sa mga moros aron pagpamihag sa mga Kristianos. Ang mga lungsoranon, pinangulohan sa Padre Kura, nagtukod ug Kota sa daplin sa suba likod sa Kombento aron tagoanan sa mga tawo, labina sa mga babaye ug mga bata.
Gisugid nga usa ka adlaw niana, gisulong ang Cagayan sa mga moros. Diha na sila sa tabok sa suba. Ang mga babaye ug mga bata nagtago na sulod sa kota. Ang mga lalaki hinoon nangandam na sa pakig-asdang sa manunulong.
Apan sa dakung katingala sa mga tawo, ang mga moros inay motabok na sa suba, nagsugod na hinoon ug sibug. Giingon nga ang moros sa tabok sa suba nakakita sa usa ka babaye sa ganghaan sa Kota likod sa kombento nga nag badlong ug nagpugong kanila sa pagtabok sa suba. Kini nahitabo samtang ang mga tawo sulod sa Kota nag-ampo sa Virgen sa iyang panabang og kalooy nga luwason niya sila sa kadaut.
Kini nga hitabo nakapainit sa pagtoo sa mga tawo sa gahum sa Virgen sa Rosario ug agig pagpsalamat kaniya, ang Virgen sa Rosario ginganlan usab nila sa Virgen sa Kota atua gipasundayag sa lawak sa Seminario.
Dili lamang kay mao da kini ang milagro sa Virgen. Mga masakiton nga nag-ungaw na
sa kamatayon nangaayo basta itungtong lamang ang larawan sa Virgen sa ilang ulo.
Apan, ang katingalahan sa tanan mao ang nahitabo sa miaging gubat sa kalibutan. Sa pagpanghulog sa mga bomba sa Cagayan, ang Katedral maayong pagkaigo. Nadugmok ug nasunog ang tanang butang sulod niini. Apan kining LARAWAN SA VIRGEN SA KOTA wala gayud maunsa. Siya nagtindog sa gibutangan kaniya nga wala masunog, bisan gilibutan sa kalayo ug ang tanan nga naglibut nangahimong abo.
Source: CIO / Cagayandeorolegends.blogspot
