Natigayon ning syudad ug sa Misamis Oriental ang upat ka insidente sa sunog.
Una nga sunog ang nahitabo niadtong adlawng Sabado, diin 80 mil pesos ang damyos, sa pagkasunog sa pipila ka kabalayan sa Poblacion, Villanueva, Misamis Oriental.
Ikaduha nga sunog ang nahitabo kagahapong adlawa sa Sityo Parola, Baok-baok, Balingoan Misamis Oriental, diin 13 ka panimalay ang gilamoy sa kalayo.
Nasayran nga 200 mil pesos ang gibana-banang damyos sa nasangpit nga sunog.
Samtang diri sa Cagayan de Oro, mokabat sa 115 mil pesos ang damyos sa pagkasunog sa duha ka andana nga panimalay sa number 84, 12th street, Barangay Nazareth ning dakbayan kagahapon sa buntag.
Matud ni Fire Inspector Sam Lorence Villarde, sa Bureau of Fire Protection kon BFP, nga na fire out ang sunog alas 9:09 kagahapon sa buntag ug nagsugod ang kalayo sa ikaduhang andana sa panimalay ni Gracia Openia, nga giabangan sa usa ka Ivy Gibon.
Dugang pa ni Fire Inspector Villarde nga sa inisyal nila nga imbestigasyun, ilang nasuta nga adunay mga bata nga nagdula og posporo nga maoy hinungdan sa sunog.
Kagabei usab, nasunog ang duha ka andanang panimalay nga gipanag-iyahan ni Amparo Ronquillo sa Pabayo-San Agustin St., Brgy. 1 ning syudad kagabii, diin gituohan nga nagsugod ang kalayo sa taas nga bahin sa maong panimalay.
Nasayran nga nga kahoy ang gigamit nga sugnod kung magluto sa taas nga bahin ang ilang boarders, ug gani kaniadto hapit na usab masunog ang maong balay, apan ila kining naapas sa pagpalong.
Nasayran nga karaan na ang maong balay, diin ang taas nga bahin gigama sa mga light materials.
By; Radyoman Aiza Enloran
