Na-inquest na ug naghulat na lamang sa resolusyon karong Lunes sa piskal ang upat ka skateboarders kinsa nakuhaan og mga dahong marijuana sulod sa ilang sakyanan.
Nasayran nga atol sa gihimong checkpoint sa Baloy, Brgy. Tablon ning syudad, sa checkpoint personnel sa Cagayan de Oro City Police Office kon COCPO ug Task Force Oro, nasimhotan ang mga suspek nga nanimaho sa gigamit nga marijuana.
Tuod man, nasuta nga nagkatag sa sakyanan sa upat ka suspek kinsa gikan pa sa Bukidnon nga mihimo sa pagsalmot sa contest sa skateboard, ang mga dahon sa layang marijuana.
Gipahibalo ni Police Chief Insp. Evan Viñas, ang hepe sa Cugman Police Station kinsa miingong anaa pa karon sa ilang mini-cell ang mga suspek nga taga-Iligan ug Cebu City.
Tungod niini, kasong pagsupak sa Republic Act 9165 ang gipasakang kaso batok nilang Janrey Boniao, Jaigg Kaico Dalumpines ug Ryan Mueco nga pulos taga-Iligan City ug usa ka Kurt Louie Kong nga taga-Cebu City.
Nakuha gikan sa mga suspek ang kapin 600 gramos nga linikit nga layang dahon sa marijuana nga gibana-banang nagbalor sa kapin 80-mil pesos.
By: Ellah Baculio
