Upat ka mga tawong gituohang ilegal nga nangisda ang nadakpan atol sa sea born patrol sa mga elemento sa Regional Maritime Unit sa kapolisan sa Region 10.
Matud ni Police Inspector Jonas Raymundo nga ang upat ka mga suspek mao silang Ronie Acuno, 40 years old, taga Barangay Patag, Naawan, Misamis Oriental, Romeo Lopez Dandasan, 62 anyos, Andy Cabarillas, 40 anyos ug Dexter Soliven, 38 anyos nga polos taga Barangay Linangkayan, Naawan, Misamis Oriental.
Gibutyag ni Raymundo nga mga alas 5 sa buntag ang mga elemento sa Regional Maritime Unit sa Camp Alagar naglunsad sa sea born patrol sa kadagatan sa Iligan Bay.
Apan matud ni Raymundo nga ilang nakit-an ang upat ka mananagat nga nangisda sa marine protected area sa Barangay Linangkayan sa lungsod sa Naawan.
Na-recover sa mga otoridad gikan sa mga suspek ang usa ka 16 horse power nga motorized banca nga nagkantidad nga 50-thousand pesos, fishing net nga tag 10-thousand pesos, 60 kilos nga Isdang Tamban, 1,400 pesos, 11 ka empty boxes sa Styrofoam nga mokabat sa 2,500 pesos, 30 meters nga pisi nga kantidad sa 800 pesos, usa ka bugsay nga tag 150 pesos,.
Ang mga suspek, gi-detain sa Maritime Unit sa Naawan ug mag-atubang sa kasong violation sa section 86, Article VI sa Republic Act 10654.
By: RadyoMan Nitz Arancon and RadyoMan Annaliza A. Reyes
