Gitunol na kagahapong adlawa ni Mayor Oscar Moreno ang tulo ka unit sa Toyota Hilux ug usa ka ka Isuzu Max ngadto sa Cagayan de Oro City Police Office kon COCPO.
Matud ni COCPO Spokesperson Supt. Mardy Hortillosa, nga aduna silay tulo ka istasyon sa kapulisan nga maoy tunolan sa maong mga sakyanan tungod kay gikinahanglan kini nila pagmaayo, ilabina nga anaa sila sa sentrong bahin sa syudad.
Tungod niini, lauman matud pa nga mas paspas na ang pagresponde sa kapolisan ilabina nga mga bag-o ang gitunol kanila nga mga sakyanan gikan sa lokal nga kagamhanan.
Gipasabot usab ni Supt. Hortillosa nga dili tanan marespondihan sa kapolisan, ilabina nga daghan ang gapangayo kanila og tabang ug dili kini dungan nga mahimo sa kapolisan.
Hinuon, nakahibalo na niini ang kapolisan diin protocol nila nga kung kinsa kadtong pinaka-importante ug dako nga panghitabo nga kinahanglang unahon sa pag-responde, mao kini ang ilang unahon.
Nasayran nga ang mga gipulihang sakyanan ang ihatag ngadto sa Bulua ug Lumbia Police Station tungod kay wala silay magamit nga sakyanan alang sa operasyon.
By: RadyoMaN Ellah Baculio
PC: Konsehal Jay Roa Pascual and RadyoMaN Joanna Ricote
