Gisikop sa kapulisan sa Misamis Oriental ang upat ka wanted persons sa managlahing higayon.
Lakip niini ang 37 anyos nga si Ronald Endricoso Resuendo, minyo ug taga San Antonio, Jasaan, Misamis Oriental.
Si Resuendo nag-atubang sa kasong slight physical injury.
Sa Purok 3, Barangay South Poblacion, Medina, Misamis gisikop ang ikaduhang suspek nga nakalapas sa ordinansa sa syudad.
Kini mao ang 28 anyos nga si Gabriel Bacol ug taga Purok 5, Barangay Maanas lungsod sa Medina.
Nasikop usab sa Magsaysay, Misamis Oriental ang usa ka lalaking nakalapas sa Republic Act 9262 o mas nailang Violence Against Women and their Children Act.
Suspek mao si Christopher Lee Revelo nga taga Purok 1, Barangay Abunda, Magsaysay, Misamis Oriental.
Temporaryong makagawas si Revelo kung makapiyansa og 36-mil pesos.
Samtang ang ika-upat mao ang wanted sa kasong arson nga namatal atol sa pagsilbi sa warrant of arrest.
Kini human misukol sa kapulisan sa Balingasag Municipal Police Station, Provincial Intelligence Branch ug Provincial Drug Enforcement Unit ang suspek nga si Michael Lumindas Dahino.
Nakuha sa posisyon ni Dahino ang napulo ka rectangular transparent plastic cellophane nga dunay sulod gituohang shabu, duha ka gagmayng heat sealed transparent plastic cellophane nga dunay sulod uga nga dahon sa marijuana, pipila ka tambal ug fragmentation grenade.
