Davai City – Naitok ang mga kabanay ni Mark Tandingan, 19 anyos, ngadto sa kapuyo niini nga maoy nilaslas sa kinatawo sa ilang pag-umangkon gamit ang usa ka sundang sa may Purok Cabang, Brgy. Pinamuno, San Isidro Davao Del Norte niadtong July 14, adlaw’ng Sabado.
Sa eksklusibong interbyu sa DXDC RMN Davao kang Janeth Belila iyaan sa biktima ug konsehal sa barangay nga andam gayod silang mupasang-at og kaso kang Jicelle Gementiza, 26 anyos, kinsa ka-live in sa ilang pagumangkon.
“Suko kaayo mi pwede ra man unta maglalis ug dili ingon ana-on among pag-umangkon awa karon bisan kay buhi na mura niya’g gipatay,” sumala niini.
Dismayado ang mga kabanay nga napasaylo ra sa biktima ang iyang kapuyo.
“Gusto kaayo namo nga kasuhan ang babae pero si Mark dapat ang complainant matud sa mga pulis gawas nalang kung namatay ni among pag-umangkon, perteng higugmaa man gud ani niya aning babaye,” sumala ni Belila.
Away magtiayon matud pa sa biktima ang hinungdan kung nganong gihimo kini kaniya sa suspek.
Saysay ni Mark nga nasuko ang iyang ka-live in nga nahubog siya atong gabhiuna.
Gani, nakamatngon nalang kini nga wala na siyay purol ug nagkadugo na ang iyang kinatawo ug niikyas ang suspek human sa insidente.
Ang suspek nitungha sulod sa ospital adlaw’ng Huwebes ug nangayo kini’g pasaylo sa biktima sa iyang gihimong pag-abis sa kinatawo niini.
RadyoMaN Aimee Guinita
