Naghallin sa ground floor ang kalayo apang padayon nga ginahibalo kon ano ang kawsa kag ginhalinan sang sunog nga nagluntad kahapon sang kaagahon sa Java Pension House sa Gonzaga Locsin Streets, Bacolod City.
Suno kay Bacolod Bureau of Fire Protection Chief, Fire Marshall Publio Ploteña nga pending pa ang resulta sang imbestigasyon bangud ginatipon pa nila ang tanan nga mga ebidensya kag witness.
Ginpahayag ni Ploteña nga nakalab-ot man sa ila nga mga impormasyon nga antes nagtuhaw ang sunog, may isa ka motorsiklo sa idalum sang pension house nga gintuyo kawaton pinaagi sa pagpaandar sini kag nag-spark gani nagluntad ang sunog, apang wala pa ini gina-kabig nga rason.
Pahayag pa sang fire chief nga sa ila imbestigasyon, may sprinkler man ang building apang ila pa usisaon kon bala ini ang naga-function pa.
Sa bahin sang 6 ka casualty, ginpahayag ni Ploteña nga nagapabilin gihapon nga unidentified ang isa sa mga ini.
Samtang iya ginpahayag nga wala labot sa Java Pension House, may pito ka iban pa gid nga mga balaligyaan kag establishment nga yara sa luyo sini ang nag-angkon sang partial damage sa amo nga sunog.
Angut sini, ginpasalamatan sang BFP chief ang tanan nga nagbulig agud matapna ang kalayo partikular ang Amity kag ang Chinese Chamber lakip na ang Talisay kag Bago City kag iban pa nga nagpadala sang ila firetruck.
Iya man ginpasalamatan ang mga nagsuporta pinaagi sa paghatag sa ila sang pagkaon kag tubig bangud apesar nga gin-declare nga fireout sang las 9 apang pasado las 2 na sang hapon na kumpleto nag mapping kag retrieval operation.
[image: image.png]
