Dala ang search warrant nga gipagawas ni Judge Renato Arroyo sa 10th Municipal Trial Circuit Court sa Manticao, Misamis Oriental, gisikop sa kapulisan sa Manticao ug sa Provincial Drugs Enforcement Unit sa Misamis Oriental si Barangay Chairman Marvin Tagalogon sa Cabalantian sakop sa nasangpit nga lungsod.
Kini tulo ka semana sa dili pa niya i-turn over ang buhatan ngadto sa bag-ong kapitan ug sa dili pa usab siya manumpa isip bag-ong kagawad sa maong barangay.
Sa report sa kapulisan, upat ka mga sachet nga gituohang shabu ang nakuha sa mga operatiba sa ilang pagpangukay sulod pa pinuy-anan ni Tagalogon, kinsa 20 ka tuig na’ng nagserbisyo sa barangay gikan sa pagka-kagawad hangtud nga nakumpleto ang tulo ka termino sa pagka-kapitan.
Niadtong nakalabay’ng eleksiyon, mikandidato ug midaug kini sa pagka-kagawad.
Gilimod ni Tagalogon nga iyaha ang mga nakuhang mga shabu sulod sa iyang kwarto tungod kay dunay daghang naka-sibilyang pulis nga misulod sa iyang balay, lakip na sa iyang kwarto, sa dihang wala pa gisugdan ang pagpangukay kauban ang mga opisyales sa barangay nga maoy saksi sa operasyon.
Si Tagalogon ang ikapitong barangay official sa Ikaduhang Distrito sa Misamis Oriental nga nasikop sa police anti-drug operation karong tuiga. Siya ang ika-upat nga kapitan.
Sa Manticao, siya ang ikaduhang kapitan nga nasikop, sunod kang Kapitan Johnny Denque sa Camanga.
