Detinado karon sa Philippine Drug Enforcement Agency kon PDEA region ten ang usa ka negosyante human ang gihimong drug buy bust operation sa Zone3 – Barangay Bugo ning syudad.
Naila ang dinakpan nga si Albert Saarenas, usa ka negosyante, ug residente sa maong dapit.
Sa pahayag sa asawa sa biktima nga si Demetria Saarenas, 61 anyos, nga ilang gireklamo ang dili makiangayon nga gibuhat sa PDEA, particular ang pagkawala sa personal nila nga mga butang sama sa upat ka kwentas nga nagkantidad sa 26 mil pesos, duha ka bracelet, duha ka singsing, duha ka arites ug cash nga mokabat sa 73 mil pesos.
Dugang pa ni Mrs. Saarenas nga nahitabo ang pagkawala sa ilang mga butang atol sa gihimong operasyon sa PDEA Ten, alas singko sa hapon niadtong adlawng Huwebes.
Samtang dako na lang ang gikatingala ni Mrs. Saarenas dihang nakadungog siya og dabog dabog sa silong sa iyang panimalay, atol sa gihimong operasyon sa PDEA region ten.
Kini ang hinungdan nga midali siya sa pagkanaog, ug nakita niya ang iyang bana nga gidakop na sa mga ahente sa PDEA.
Matud ni Mrs. Saarenas nga mideretso lang og sulod ang PDEA sa ilang balay ug giguba ang ilang pirtahan ug gidakop ang iyang bana nga walay warrant.
Hinoon wala makita ni Mrs. Saarenas kung aduna bay ka transakiyun ang iyang bana sa silong, ayha nahitabo ang operasyon sa PDEA region ten.
Gidugang ni Mrs. Saarenas nga gisaka sa taga PDEA ang ilang panimalay ug gipanghaloghog ang ilang mga gamit.
Ang gikatingala lamang ni Mrs. Saarenas, nga ang iyang kwarto mao ang grabeng gi-halungkat sa taga PDEA.
By: RadyoMaN Mishelle Enloran
PC: RadyoMaN Anne Jane Duhaylungsod
