Usa ka sundalo patay, lima samaran sa engkwentro sa militar ug Dawlah Islamiya-ISIS sa Lanao del Sur

44

Gipasidunggan kagahapon sa buntag ang lima ka mga sundalo nga nasamdan sa engkwentro niadtong Sabado batok Dawlah Islamiya, didto sa may bukirang bahin sa Balindong, Lanao del Sur.

Kini giilang sila si Second Lieutenant Edon John Sumpay, Privates First Class Jeson Orias ug Alony Gado, Jr., ug Sergeant Rodgen Pumares, sa 82IB ug Private Almie Maputi sa 55IB.


Mismong si Brigadier General Generoso Ponio, commander sa 1st Infantry Division, ang mitaud sa Wounded Personnel Award, human sa flag raising ceremony sulod sa Kuta Cesar Sang-an Station Hospital sa 1ID Headquarters sa Labangan, Zamboanga del Sur.

Gipasalig ni Ponio sa mga samaran nga hatagan sila og maayong serbisyo alang sa ilang dali nga pagka-ayo.

Naka-engkwentro sa tropa sa 55th ug 82nd IB niadtong Sabado ang kapin kun kulang 20 ka mga armado, matud pa ni Captain Clint Antipala, acting officer sa 1st Division Public Affairs Office.

Namatay sa maong engkwentro si Private Ellasar Palma sa 55IB.

Matud pa ni Colonel Jose Maria Cuerpo, commander sa 103rd Infantry Brigade, posibleng adunay namatay o samaran sa panig sa mga armado tungod sa mga dugo nga nakit-an sa agi-anan kung asa sila nag-withdraw. (Divina M. Suson, February 18)

Facebook Comments