Davao City – Usa patay samtang duha samaran sa tropa sa kasundaluhan human sa nahitabong engkwentro sa Salaysay, Marilog District ning syudad sa Davao.
Sa pakighinabi sa DXDC RMN Davao kang Captain Eric Calulot, CMO officer sa 3rd Infantry Battalion Philippine Army nga usa ka Cafgu Active Auxiliary (CAA) ang napatay samtang samdan ang duha ka mga sundalo.
Dugang niya nga wala pa usab nila nasuta og aduna bay napagan sa bahin sa New People’s Army diin sa karon padayon silang naglusad og hot pursuit operation sa nasangpit nga lugar.
Kahinumduman nga duha ka sunod-sunod nga engkwentro ang miulbo sa Salaysay, Marilog District bandang alas 2 kagahapon sa hapon tali 3rd IB ug sa gibana-banaang 20 ka mga sakop sa Guerilla Front 54 ilawum sa grupong NPA.
Una na usab giingon sa kapitan sa Salaysay nga si Kapitan Robert Itdang nga gibana-banaang anaa sa kapin 30 ka mga pamilya ang namakwit tungod sa kahadlok nga mapagan sa engkwentro apan sumala ni Captain Calulot, padayon pa usa nilang ginaberipika ang impormasyon aron usab makatunol og hinabang sa mga apektadong residente.
RadyoMaN Renz Barbarona
