Cotabato City – Gipresentar sa buhatan ni City PNP Director Police Sr. Supt. Rolly Octavio ang usa sa duha ka gitudlong responsabli sa nahitabong pagbusikad sa Cotabato City niadtong bisperas sa Bag-ong tuig.
Nasayran nga mismong mga kabanay niini maoy nipresentar sa suspek atubangan mismo ni Col Octavio.
Giila ang suspek nga si Salipudin Lauban Pasandalan Alias Pudin, 53 anyos, residente sa Barangay Awang Datu Odin Sinsuat Maguindanao. Tumong sa mga kabanay nga pagpresentar sa nasampit sa kapulisan aron ilang klaruhon nga walay kamatuoran nga siya lambigit sa pagbutang ug bomba.
Aduna matud pay deperensya sa panghuna-huna ang nasampit ug nag laroy-laroy lang sa kadalanan. Wala usab matud pa kini kakayahan sa paghimo ug unsa mang pagpanabotahe.
Hangyo sa pamilya nga unta mahatagan ug patas nga imbestigasyon ang suspek sa kasong gikalambigitan niini. Sa karon pabilin pa sa kustudiya sa kapulisan ang nahisgutan.
(Photo Credit to: PRO-12)
