General Santos City—walo angol sa nahitabong pagbalintong sa passenger van sa national highway nga sakop sa Malungon, Sarangani Province.
Sa report sa malungon PNP nasayran nga alas 9:00 ang takna sa buntag kagahapong adlawa dihang nahitabo ang pagbalintong sa pampasaherong van sa National Highway sakop sa Banate, Malungon nga gikaangol sa walo ka mga pasahero.
Samdan silang si Daisy Pilapil, Analyn Nunay, Lian Kent Estrada, Richard Gunato, Hanah Jane Bayatao, Violeta Palma, Lito Palma ug Kien Arnold Mejia.
Nasayran nga gikan sa Gensan ang Van ug padulong unta sa syudad sa Davao, pag abot sa lugar nawad-an ug control ang driver mao nga kini nabalintong.
Paspas nga gipangdala sa Dr. Jorge Royeca Hospital dinhi sa Gensan ang mga samdan nga pasahero diin pito ang gilayon nga nakagawas gumikan minor lang nga mga samad ang naangkon, samtang usa ang nagpabilin nga mao si Daisy Pilapil kansa nakaangkon ug bali sa lawas.
Sa karon ginasuta pa sa Traffic Management Unit sa Malungon Municipal Police Station ang hinungdan sa pagbalintong sa maong van.
