TACLOBAN CITY – Ginpapahinumdom han Land Transportation Franchising and Regulatory Board (LTFRB) an mga van operators dinhi ha aton dapit Eastern Visayas nga sumunod ha fare adjustment nga ginpapatuman ha ilarom han LTFRB Memorandum Circular 2007-007.
An diri mag-implementar han P2 nga pasahe per kilometer in may kaka-atubangon nga penalidad, ini in sumala kan LTFRB Regional Director Gualberto Gualberto ha interview han PNA.
Sumala kan Gualberto, kinahanglan sumunod an mga van operators ngan diri la maghimo-himo han ira kalugaringon nga polisiya.
“Kinahanglan sundon an memorandum han LTFRB ngan humatag hira hin discounts ha mga persons with disabilities, senior citizens ngan students” – Gualberto
Nakakarawat gihapon an LTFRB hin reports nga may mga van operators nga nadiri pag implementar han bag-o nga fare rate nga diri nahatag hin discounts.
Sumala han pira nga van operators, diri commuter-friendly an bag-o nga fare rate ngan posible nga mawarayan hira mga pasahero.
An P2 fare adjustment in dapat naimplementar dida pa han 2007 nationwide pero waray ini ka-implementar dinhi ha Eastern Visayas matapos magfile hin petisyon an mga van operators dida han 2009 nga pahamubuan ha P1.40 per kilometer.
Pero dida han March 2019, pareho nga grupo han operators an nagfile hin petisyon para igbalik an P2 fare adjustment.
Sumala kan Gualberto, an mga van operators nga nadiri pag implementar han fare adjustment hin matalapas ha terms and conditions han Memorandum Circular ngan mabayad hin P5,000, posible masuspende ngan makanselar an prangkisa.
Gin-aaghat ni Gualberto nga bisitahon an opisina han LTFRB para kuhaon an ira mga fare matrix.
Kinahanglan daw nga nakadikit an original copy an fare matrix ha mga units han van.
