Davao city – Nangangha ang operation manager sa North Bound Van Terminal sa may Bajada ning syudad sa pagkunhod sa mga pasahero nga mupauli sa mga probinsiya aron didto mag kalag-kalag sa Nobyembre uno ug dos karong tuiga.
Matud ni Romel Bajador nga sukad pa sa miaging adlaw mingaw sa mga pasahero ang ilang terminal dili sama sa nanglabay nga mga undas nga petsa 30 sa Oktobre pa lang dasok na ang pila sa mga muuli.
Hugot nilang gipangandaman ang undas tungod sa volume sa mga pasahero nga mubiyahe sa mga lugar sa Mindanao apan sukad kagahapong adlawa bakante kaayo ang mga lingkoranan sa ilang van terminal.
Segun ni Bajador nga apektado sila sa pag-usab sa klase sa mga kolehiyo gikan sa Hunyo nga gihimo na sa Agosto ang semester hinungdan nagminos gayod ang ilang mga pasahero karong panahona.
Malaumon ang operation manager nga ugmang adlawa magdagsa na ang mga pasahero aron makabawi sila sa pila ka adlaw nga pagkalugi sa mga biyahe niining panahon sa kalag-kalag.
Hinoon gipasalig ni Bajador nga 24 oras ang mga biyahe sa ilang mga van aron masiguro nga makauli ang mga pasahero nga buot muhabol og uli sa ilang mga lugar sa adlaw sa kalag-kalag ugmang adlawa.
RadyoMaN Joel Viray
