VEHICULAR ACCIDENT | DUHA KA MOTORSIKLO NGA NAGA-KARERAHAY SA BANWA SANG ANILAO, NAGBUNGGO SA TRUCK, ISA ANG PATAY.

35

Isa ang patay kag tatlo ang pilason sa nagluntad nga vehicular accident sa barangay Camiros, Anilao, Iloilo pasado alas 6 kagab-i (Pebrero 24).

Ginkilala ang napatay nga si Efren dela Cruz Jr., legal ang pang-edaron sang Aglalana, Passi City, driver sang STX motorcycle kag pilason ang iya backrider nga si Mark Labrador.

Samtang pilason man ang sakay sang Skygo Motorcycle nga sanday Oscar Dellera, driver kag backrider sini nga si Russel Pasono nga lunsay pumuluyo man sang Aglalana, Passi City.

Ginpahayag ni Police Chief Inspector Ciriaco Esquelarga, hepe sang Anilao PNP nga halin sa banwa sang Anilao ang duha ka motorisklo kag nagakarerahay padulong sa Passi City.

Subong man, pag-abot sa Barangay Camiros, Anilao, nakasugata ang mga ini sang truck nga may karga nga tubo kag ginamaneho ni Rodolfo Araquel kon sa diin nagpondo ini sang makita ang nagakarerahay nga duha ka motorsiklo.

Sa pihak sini, nagbunggo ang duha ka motorsiklo sa truck nga gintunaan sang kamatayon sang driver sang isa ka motor nga si Efren Dela cruz kag pagkapilas sang tatlo pa ka iban.

Yara naman sa custody sang Anilao PNP ang driver sang truck kag posible magapangatubang sang nagakaigo nga kaso.

Facebook Comments