Ginpahold ni South Cotabato Vice Governor Vicente De Jesus ang pipila ka mga programa sang vice governor’s office samtang wala pa nakasulod ang magpungko nga bag-o nga administrasyon.
Suno sa iya partikular sa ginpahold niya ang open government partnership sa bahin sang open legislation commitment nga kabahin suno pa ang Vice Governor’s Office.
Ginpahayag ni Vice Governor De Jesus nga luyag anay nila hibaluon kon ini bala ang prioridad man ukon indi ni Governor-elect Reynaldo Tamayo Jr., agud indi na sila mag usik sang oras.
Nahibaluan nga gin-aprubahan sang Sangguniang Panlalawigan sang South Cotabato ang resolution nga naga-adoptar sa Open Legislation Commitment sang probinsya sa diin ang nasambit nga resolution ang magapabaskog kag magasiguro sa implementasyon sang Open Legislation Commitment nga may katuyuan nga mag-establisar sang online kag offline channels agud mapasanyog ang pag intra sang mga pumuluyo sa pagkreer sang mga importante nga local legislations.
Madumduman nga napilian ang South Cotabato sa mga subnational government sa bilog nga kalibutan bilang nagaisahanon nga LGU sa Pilipinas nga nangin partisipante sa Open Government Partnership Local Program kon sa diin mismo si Governor Daisy Avance Fuentes ang nagpartisipar sa Open Government Partnership Regional meeting sa Seoul, South Korea. Lakip sa lima ka mga commitments sa OGP amo ang Open Information, Open Monitoring and Evaluation, Open Contracting, Open Mining Information, kag Open Legislation.
