BACOLOD CITY – Nagpadulong na sa Food. and Drug Administration (FDA) ang isa ka customer nga nagreklamo batuk sa isa ka manugbaligya lechon sa Brgy. Singcang Airport, Bacolod nga tuman ka gamay kag indi worth ang iya ginbakal sadtong December 31, antis mag media noche.
Sa interview sang DYHB, ginpahayag sang complainant nga si Cristy Joy Yanson Escarcida sang Brgy.Bata nga December 11 pa lang nagpa reserve na siya sa Avelino’s Lechon sang isa ka order para sa December 31 sa presyo nga P4,000 pesos.
Suno sa iya nga sang iya na nakuha kag nadala ang lechon sa ila balay nakibot siya nga tuman ini ka gamay, wala unod kag puro lang tanglad kag batwan.
Bangud sini, nagbalik sa lechonan si Cristy Joy agud kuntani magpangabay nga ilisan lang ang iya nabakal, apang, sa alegasyon sang complainant nga imbes nga istoryahon sang matawhay ini siya ang gin-yawyaw sang tag iya kag wala nagpa settle.
Ini nga reklamo ni Cristy Joy ang nag-trending sa social media matapos niya nga ginvideo ang lechon kag ginpost sa facebook.
Suno sa tagreklamo wala siya sang malain nga intensyon sa iya pag-post sa facebook nga pakahuy-an ang Avelino’s kundi ipa-utwas lang ang iya kalain sang buot kay madugay na siya nga customer sini kag wala siya nag-expect nga ini ang matabo.
Ang ini nga insidente ang napa-blotter na ni Cristy Joy sa Police Station 1.
Samtang, gilayon nga ginpasabat sang dyHB ang tag-iya sang Avelino’s Lechon nga si Annabelle Acebuche Balgoma angut sa reklamo sang isa nila ka customer nga si Cristy Joy nga tuman ka gamay sang iya gin-order nga lechon kag halos wala sang unod sa sulod.
Sa interview sang DYHB, ginklaro ni Annabelle nga indi matuod nga ginyawyaw niya si Cristy Joy kag gintaasan sang tingog, kundi ginpaathag gid lamang niya sa customer nga ang kadakuon sang baboy ang worth lang sa presyo sini nga 4 mil pesos.
Suno kay Annabelle nga si Cristy ang nag-una binastos sa ila baligyaan pinaagi sa pagpanglampos sa ila lamesa kag nag post pa ini sa facebook nga nagpakahuya naman sa Avelino’s.
Pahayag pa niya nga sa atubang mismo sang mga pulis nga gindala ni Cristy Joy, iya ginpakita ang sitwasyon sang lechon kon diin gina-insist ni Annabelle nga wala ini ginlaplapan, yara sa maayo nga kondisyon ang lechon kag wala sang diperensya.
Siling ni Annabelle nga indi na pwede mabalik ukon ma refund ang kwarta bangud nabaligya na ini kag madamo pa kuntani ang naga-pila para magbakal sini.
Ginklaro pa sang taga-Avelino’s nga bag-o lang nila nga customer si Cristy Joy kag indi matuod nga dugay na nagabakal sa ila kaangay sang pahayag sang amo nga customer.
Indi man nila gusto gub-on ang ila negosyo sa P4k nga lechon.
Apang sa sabat naman ni Cristy Joy, kon maayo lang tani ang pagtratar sa iya indi na maglab-ot sa social media kag pulis ang tanan. Pahayag niya nga tatlo na sya ka tuig nga gabakal lechon sa Avelino’s kag subong lang sya kakita sang manipis nga lechon.
Dugang pa niya nga porsigido siya nga ipalab-ot ang reklamo sa Food and Drug Administration para matagaan sang leksyon ang pila ka manuglechon nga nagapanginto lang sa ila mga kustomer.
