Gipanghimakak sa usa ka 23 anyos nga lalaki ang nagviral sa facebook nga siya gikulata sa kapulisan sa Macasandig human siya nasikop kay suspek sa pagpanulis niadtong Nobyembre 29 ning tuiga.
Matud sa suspek nga si Janbert Pagula, 23 anyos, ulitawo ug taga Divine Mercy, Opol, Misamis Oriental nga nagpasalamat pa man gani siya nga niabot ang kapulisan kay gitabangan na siya og kulata sa mga tambay sa lugar.
Gikakurat usab sa kapulisan ang viral post sa facebook busa nagpatawag sila og press conference sa pagpangulo ni Police Station 9 Macasandig, Chief of Police, Police Sr. Insp. Mario Mantala, Jr. aron mahatagan og katin-awan ang tanan.
Nasayran nga niadtong Disyembre 2 ning tuiga, gi post sa facebook account nga Hostado Abogado ang video sa pagkulata sa biktima ug ang kapulisan sa Macasandig maoy gipasanginlan nga mikulata.
Ang maong post miani og negatibong komento batok sa kapulisan sa Macasandig nga gikadismaya usab sa mga personahe sa maong police station.
