Davao City – Gikumpirma ni Davao City Mayor Sara Duterte-Carpio nga gikonsidera karon isip Person Under Monitoring (PUM) sa Coronavirus Disease 2019n (COVID-19) ang igsoon niining si Davao City Vice Mayor Sebastian ‘Baste’ Duterte human kini nagkasakit.
Sa anunsyo ni Mayor Sara sa Davao City Disaster Radio gibutyag niini nga nagbaton og kalintura, sore throat ug ubo ang batang Duterte hinungdan nga na-enrolled kini isip PUM sa COVID-19.
“Naa syay sore throat, naa siyay ubo, naa siyay kalintura ug person under monitoring siya. We hope you will get soon vice mayor Baste and we hope nga walay COVID-19,” saysay ni Mayor Sara.
Tambag sa alkalde nga igsoon niini nga dili na magpa test tungod na usab sa kulang nga COVID-19 testing kits dinhi sa syudad sa Davao. Hinuon anaa na sa self-isolation ang bise mayor.
Subling gipasabot sa alkalde sa katawhan nga kung walay importanteng lakaw, magpabilin na lamang sulod sa balay aron malikayan ang COVID-19.
RadyoMaN Kirby Manzon
