Davao City – Naga imprubar na karon ang kahimtang sa 21 anyos nga babayeng pinakaunang pasyenteng nagpositibo sa COVID-19 dinhi sa Davao region.
Kini mao ang gibutyag ni Dr. Bryan Dalid, Chief of Hospital sa Davao Regional Medical Center (DRMC) sa Tagum City atol sa gipahigayong online presscon sa Department of Health ug Philippine Information Agency diin anaa karon sa ERID ward ang maong pasyente.
Saysay ni Dalid nga human sa maong kaso, nag establisar ang DRMC og mga grupo nga motutok sa COVID-19 diin kini gilangkuban sa mga doktor, nurses, ug paramedics.
Gikanayon sa labaw sa DRMC nga sa pinakaulahing datos, anaa sa 11 ka mga pasyente na ang ilang na discharge diin niadtong Marso 9 dunay 15 ka mga PUIs ang miabot kanila ug gilaumang karong adlawa muabot ang ilang mga resulta hinuon nagapamaayo na usab ang ilang mga kahimtang.
Subay niini, maglusad og contact tracing ang DOH sa tanang nakasugat ingon man nakasabay sa nagpositibo sa COVID-19.
Sumala ni Dr. Cleofe Tabada, DOH-XI RESU chief, nga magsugod sila sa pamilya, higala o mga nakahinabi sa maong pasyente sukad niabot niadtong Pebrero 29 hangtod sa mga misunod nga adlaw.
Saysay ni Tabada, nag request na ang Bureau of Quarantine sa mga listahan sa pasahero nga kasabay sa nag positibong pasyente ilabi na ang upat ka mga tao nga anaa sa likod, atubangan ug kiliran sa maong pasyente.
Giangkon sa maong doktor nga gamay pa lamang ang ilang nasubay diin dunay duha ang nakigkoordinar kanila ug miingon nga walay mga simtomas.
Gani panawagan sa mga opisyal sa DOH ngadto sa mga nakasabay sa PAL1230 flight niadtong Pebrero 29 nga magpahibalo sa pinakaduol nga health centers.
Gipahinumdoman usab sa health officials ang publiko nga batasanon ang maayong panglawas ug motuman sa mga guidelines nga gipagula sa lokal nga panggamhanan sama sa social distancing ug coughing etiquette.
RadyoMaN Jason Amisola
