MOISES PADILLA, NEGROS OCCIDENTAL – (1st Update) Nagpangamuyo, nagpasalamat kag nagsimba.
Ini ang una nga ginhimo ni Moises Padilla Vice Mayor Ella Garcia-Yulo matapos nga ini siya ang gin-release na sa custodial facility sang Moises Padilla PNP upod ang iya bana sadtong nagligad nga Sabado sang gab-i, January 6.
Sa exclusive interview sang DYHB, ginpahayag ni Garcia-Yulo nga ang release order ginpirmahan sang Provincial Prosecutor’s Office sa rason nga insufficient evidence kon diin ginpirmahan ini sang December 29, 2017 pa apang Enero 6, 2018 na kag gin-implement ang order.
Liwat ginklaro sang bise alkalde nga ang mga gin-submit nga ebidensya sang hepe sang Moises Padilla nga si Police C/Insp. Allan Reloj batuk sa ila ang indi matuod kag lunsay planted kaangay sang granada, duha ka iban pa nga armas kag shabu.
Suno kay Garcia-Yulo nga ang legitimate gid lamang sa mga armas nga nakuha sa ila salakyan amo ang isa ka pusil nga Amscor nga ginapanag-iyahan sang iya bana, apang ini ang may lisensya, wala sang load kag masami nabutang sa box.
Sa karon suno kay Garcia-Yulo, may ginaklaro pa ang iya abogado nga si Atty. Chiu sa teknikalidad sang order kon bala ini ang temporary release gid lamang bangud wala sang piyansa nga ginmandu./Ricky Filoteo photo
