TALISAY CITY – Ginpangunahan ni Commissioner Atty. Rowena Guanzon ang Voter’s Education Campaign para sa mga pamatan-on tuhoy sa pagboto sa nagahilapit nga Barangay kag SK elections sa bulan sang Mayo.
Nagpadulong dire sa probinsya sang Negros Occidental si COMELEC Commissioner Atty. Rowena Guanzon agud maghatag sang iya mensahe sa mga estudyante,kag mga pamatan on sa Carlos Hilado Memorial State College sa syudad sang Talisay tuhoy sa insakto nga pagpili sang mga kandidato sa Mayo 14, 2018 nga Barangay kag SK elections.
Suno kay Guanzon nga ang pinakadamo nga mga botante ang yara sa karun nagabotho sa kolehiyo kag nagakadapat nga sa lamharon nga edad mahatagan na sila sang giya kun ano nga sahi sang mga kandidato ang ibutang sa pwesto.
Isa sa gin ehemplo ni Guanzon kun nga nagahatag sila sang Voter’s Education amo ang pungsod South Korea bangud ginatudluan ang mga pamatan-on sa pagpili paagi sa isa ka sentro kag ini kabahin sang demokrasya.
Luyag sang COMELEC nga indi kita maulihi kun ikumpara sa iban nga pungsod kag paagi sini mahibaluan sang mga botante ang ila kinamatarong.
Dugang pa ni Guanzon nga madamo sang nagapamangkot kun ngaa ginahimo ini sang COMELEC kag ang sabat amo ang pagbag-o sa talatapan bangud sa masami ang yara sa pinsar sang mga tawo nga ang COMELEC para na gid lang sa pag isip sang boto sa tagsa nga may piniliay.
Bahin naman sa palamungkutanon kun bala madayon ang eleksyon sabat bi Guanzon nga COMELEC nakahanda na gid kag pwerti kalayo ang maami naton nga mabatian nga ang plebisito para sa pederalismo idungan sa Barangay Election.
Bangod bisan ipaisol pa sa Oktobre 2018 ang Barangay Election wala sa gihapon sang pundo ang COMELEC para nga madungan ang plebisito bangod nagakadapat nga mag aprubar anay ang Kongreso sang dugang nga pundo para diri kag ini nga lihok indi madali dali.
Isa sa ginalantaw ni Guanzon nga ang insakto nga tion sa pagpatigayon sang plebisito amo ang bulan sang Mayo 2019 kadungan sang Local Election para may yara pa sang nagakaigo nga panahon agud matun-an sang matul-id ang ginahandom nga Charter Change./ Grace Supe
