Wala pagtugot sa F2F end-of-school year rites gipasabot sa DepEd XI

Davao City – Giklaro sa Department of Education (DepEd-XI) nga ilaha pang gipaabot ang guidelines alang sa pagpahigayon og face-to-face (F2F) graduation o recognition activities o end-of-school year (EOSY) rites.

Sa interbyu sa DXDC RMN Davao kang Jenielito Atillo, tigpamaba sa DepEd-XI, gitataw niini nga kinahanglan nga paaboton ang mando gikan sa DepEd Central Office aron masayran kung unsaon himuon ang aktibidad ug kung unsa ang mga angay ug dili angay buhaton ilabina karong panahon sa pandemya hatud sa Coronavirus Disease 2019 (COVID-19).

“It does not necessarily mean and categorically mean nga the denial is already final. It will be reconsidered once the guideline is released by the Department of Education Central Office,” tataw ni Atillo.

Nasayrang pipila ka Dabawenyos, ang nialma human sa pamahayag sa DepEd official sa wala pagtugot sa F2F school activities, apan gitugotan ang pagpahigayon og political rallies kung asa nagdasok ang mga tawo.

Gipasabot ni Atillo, dili mamahimong ikumpara ang mga rally ngadto sa pagpahigayon og F2F school activities tungod kay mga hamtong ang sagad nagapartisipar sa aktibidad sa politika, samtang sa eskwelahan, mga bata ang kinahanglang ikonsidera ilabina nga dili tanan minors bakunado batok COVID-19.

Dugang sa DepEd-XI official, mamahimo nga mag-reschedule ang mga eskwelahan sa paghimo og F2F ceremonies, samtang ginapaabot pa ang guidelines alang niini.

RadyoMaN Kirby Manzon