General Santos City—walay recruitment sa Ansar Al Khilafa Philippines (AKP), iladong sympathizer sa ISIS sa lungsod sa Maasim, Sarangani Province kini ang gihingusgan ni Maasim Acting Mayor Uttoh Salim Cutan.
Sumala niini nga base sa ilang monitoring walay pagpangrecruit nga gihimo ang maong grupo human sa kamatayon sa founder niini nga mao si Muhammad Jafaar Maguid alias Kumander Tokboy Maguid kansa namatay atol sa gihimong operasyon sa kapulisan sa Maasim, niadtong nakalabayng tuig.
Sa kasamtangan matud pa pipila nalang ka mga miyembro sa AKP ang nahibilin nga nagtago-tago sa ilang munisipyo ug kasigbit nga lugar. Samtang uban kanila ang una nang nasikop sa operatiba sa PDEA, Militar ug kapulisan atol sa operasyon batok iligal nga droga.
Kampante hinuon si Cutan nga dili na makapanghasi pa ang maong grupo sa ilang lugar tungod hugot man nga seguridad ang gipatuman sa kapulisan sa lungsod.
