Gitingkagol na sa prisohan ang nadakpang wanted nga personalidad sa kasong robbery atol sa gilusad nga operasyon sa mga kapulisan adtong milabayng Sabado didto sa Sitio Ponoon, Barangay Lambagan, Cabanglasan, Bukidnon.
Giila ang nadakpang wanted nga si Jomar Salinsagan, 23 anyos, ulitawo, Top 3 Most wanted Person sa Bukidnon ug residente sa naasoy nga dapit.
Gipangunahan sa mga personahe sa 1st Bukidnon Police Mobile Force Company (PMCF) inubanan sa Cabanglasan Municipal Police Station, Bukidnon Provincial Intelligence Unit (PIU), 1004th Maneuver Company ug sa Regional Mobile Force Brigade (RMFB)-10 ang pagpasaka sa warrant of arrest sa suspetsado sa kasong Robbery nga gi-issue ni Hon. Ma. Theresa Aban-Camannong, Presiding Judge sa Regional Trial Court, 10th Judicial Region, Branch 9, Malaybalay City, Bukidnon pinitsahan Oktubre 12, 2021 nga adunay girekomendang piyansa nga mukabat sa P100,000. Alang sa temporaryong kagawasan.
Temporaryong gitingkagol sa Cabanglasan Municipal Police Station ang suspetsado alang sa tokmang disposasyon.
