Patay na nga gidala sa balay-tambalanan ang usa ka wanted nga personalidad sa kasong murder sa dihang misuway kinig ikyas sa mga kapulisan ug dihang gituohang giatake sa kasing-kasing atol sa operasyong gipahigayon didto sa Sitio Dapolan, Purok-1, Brgy. Apo Macote, Malaybalay City.
Giila ang namatayng suspetsado nga si Francisco Aribe, 54 anyos, minyo ug residente sa naasoy nga lugar.
Sumala sa taho sa kapulisan, nga misuway og ikyas ang suspetsado sa dihang gipasakaan og warrant of arrest sa mga otoridad dala ang kalibre 45 nga armas ug usa ka improvised shotgun. Gilakag kini sa kapulisan ug sa wala damhang panghitabo natumba kini sa kilid sa sapa nga bahin sa maong lugar hinungdan sa pagkawad-ag pamoot niini tungod sa atake sa kasing-kasing ug sa daling kamatayon sa suspetsado.
Ang suspetsado ang anaay warrant of arrest sa kasong murder nga gi-issue ni Hon. Wilfredo G. Bibera Jr., Acting presiding judge sa Regional Trial Court, 10th Judicial Region, Branch 10, Malaybalay City pinitsahan Nobyembre 28, 2016 nga walay girekomendang piyansa alang sa temporaryong kagawasan.
Cardiogenic Shock Secondary to Acute Coronary syndrome ang sumala pa hinungdan sa kamatayon sa suspetsado.
