General Santos City—tingkagol na karon sa silda sa Kiamba Municipal Police Station ang usa ka 45 anyos nga lalaki kansa nag-atubang ug kasong Qualified Theft human nasikop sa gihimong operasyon sa kapulisan alas 8:00 ang takna sa gabie niadtong nakalabayng adlaw sa Sitio Cambuhan, Barangay Luma, Kiamba, Sarangani Province.
Suspek giilang si Raul Palmes, 45, residenti sa samang lugar. Basi sa impormasyon nga nakuha sa RMN Gensan News Team nasayran nga una nang nakadawat ug impormasyon ang Kiamba Municipal Police Station nga nakit-an ang presensya sa suspek ngadto sa maong lugar mao nga gihimo gilayon ang operasyon nga miresulta sa pagkasikop niini.
Bitbit sa kapulisan ang warrant of arrest sa kasong qualified theft nga giatubang sa suspek nga dunay criminal case no. 5321-14 ug 5322-14 nga una nang gipagula ni Hon. Judge Oscar Noel Jr. sa Justice On Wheels.
Sa karon commitment order nalang ang gihuwat sa kapulisan aron nga mabalhin na ang nasangpit sa Sarangani Provincial Jail.
