NEGROS OCCIDENTAL – Nagdangat na tanan sa kapin 450 ka mga drug personality sa Western Visayas ang natigayon nga madakpan sang pulis sa nagapadayon sini nga anti-drug operations.
Ini ang base sa pinaka ulihi nga data sang PNP Regional Office 6 humalin nga ginbalik ang war on drugs sang kapulisan humalin December 5, 2017 tubtub March 5, 2018.
Ginpahayag nga sa 450 ka mga nadakpan nga drug personality, 181 diri ang naghalin sa Bacolod City, 140 halin sa Negros Occidental, 53 ang nadakpan sa Iloilo City, 29 gikan sa probinsya sang Iloilo, 16 sa Antique, 8 sa Aklan kag 2 ang nadakpan sa probinsya sang Guimaras.
Angut sini, ang numero nagapakita nga 71 percent sang mga nadakpan ang naghalin sa Negros Occidental.
Apang, ginpaathag naman ni PRO-6 Spokesperson PSSupt. Gilbert Gorrero nga positibo naman ini para sa Negros Occidental bangud nagapakita lamang ini nga mas may focus ang kapulisan sa ila kampanya kontra illegal drugs.
Patimaan ini suno kay Gorrero nga madamo sang nangin accomplishment ang pulis humalin nga nagbalik sila sa Western Visayas./dyHB BACOLOD
