TALISAY CITY, NEGROS OCCIDENTAL – Kapin 15 ka gramos sang shabu ang natigayon nga ma-recover halin sa isa ka 64-anyos nga tigulang sa buy bust operation nga ginpatigayon las 9:15 sini gid lamang nga aga sa Brgy. Matab-ang, ciudad sang Talisay.
Nakilala ang suspek nga si Corazon Vergel, single kag pumuluyo sang Brgy. 27, Bacolod City.
Ang buy bust operation ginpatigayon sang Talisay City Police Station kag sang Provincial Drug Enforcement Unit sang NOPPO sa pagpamuno ni Police C/Insp. Rogelio Pacificar.
Sa pagdakup kay Vergel, nakuha sa iya possession ang isa ka gamay nga plastic sachet, 2 ka daku nga plastic sachet kag 2 pa gid ka elongated plastic sachet sang suspected shabu nga nagabug-at sang kapin 15 grams.
Ginabulubanta nga ini ang nagabalor sang kapin 180 mil pesos.
Detained na karon sa custodial facility sang Talisay City Police Station ang suspek kag ginahanda ang kaso nga igapasaka batuk sa iya./dyHB BACOLOD
