Malaybalay City, Bukidnon – Magpadayon karong tuiga ang kampanya sa Philippine National Police kon PNP region 10 batok sa illegal nga droga ug ang internal cleansing sa hanay sa kapulisan.
Sa interview sa RMN Malaybalay ngadto kang PNP 10 regional spokesperson PSupt. Lemuel Gonda, gibutyag niini nga nagpadayon ang ilang illegal drugs operation, pamatuod niini, ubay-ubay na matud pa ka operasyon ug accomplishment ang ilang nahimo sukad nga gibalik ngadto sa PNP ang pagpanguna sa anti illegal drug operations.
Gawas niini, gihatagan usab sa pagtagad ni Gonda nga mas gipahugtan pa nila ang internal cleansing sa hanay sa kapulisan pinaagi sa pagpahigayon ug drug test matag karon ug unya.
Matud sa opisyal nga walay kalainan sa ilang pagpahigayon sa operasyon sa ilang subling pagbalik sa war on drugs, ug igo lamang nilang gituman ang nakalatid sa Republic Act 9165 ug ang pagpahinumdom sa police operational procedure.
Samtang subli usab nga nag-awhag ang si Gonda sa publiko nga isumbong gilayon ang unsa may kadudahang butang o lihok sa palibot aron mahatagan ug aksyon sa kapulisan.
