Roxas City, Capiz – Ginpangunahan ni anay DILG Secretary Mar Roxas ang launching sang War On Worms-Nutrition, Water-Sanitation-and Hygeine Project (WOW N WASH) sa syudad sang Roxas. Katuyuan sang nasambit nga proyekto nga matapna ang pagtaas sang numero sang mga estudyante nga may bitos ukon bulate sa tiyan.
Ginpahayag ni Roxas nga 67 porsyento sang mga bata sa Roxas City ang bulate infected suno sa pagtuon sang UP College of Medicine, rason nga naalarma kag nabalaka ini. Bangud sini nagdihon si Roxas sang inisyatibo agud mabuligan ang Roxas City kag probinsiya sang Capiz nga mangin bulate free.
Sa ginpatigayon nga launching sang War On Worms-Nutrition, Water-Sanitation-and Hygeine Project (WOW-N-WASH) sa Don Conrado Barrios Memorial School, ginpangunahan man ni Roxas kaupod pila ka opisyal sang syudad kag probinsya ang pag-inom sang pampurga nga bulong agud ipakita sa mga mga kabataan kag ginikanan nga safe ang nasambit nga bulong.
Ginpakita man sang anay tiglikom ang proper hand washing sa mga bata para himuon sang mga ini nga habit antes kag pagkatapos magkaon sa sulod sang ila balay, sa mga eskwelahan ukon diin man nga duog. Nag-angkon man sang kapareho nga programa ang mga estudyante sang Punta Cogon Elementary School sa syudad sang Roxas.
Samtang nagpasalig man ang mga lokal nga opisyal nga magapain sang pondo kag magadihon sang mga pamaagi agud dalayon na nga matpna ang pagtaas sang numero sang mga bata nga apektado sang bitos.
Nagtambong man sa nasambit nga programa sanday Capiz Gov. Antonio del Rosario, Roxas City Mayor Angel Alan Celino, Vice Gov. Esteban Nonoy Contreras kag iban pa nga opisyal sang syudad kag probinsya.
Ang nasambit proyekto ang natigayon bangud sang inisyatibo ni former DILG Sec. Mar Roxas sa bulig sang Gerry Roxas Foundation, UP-PGH, Provincial and City Government, DepEd Roxas City Div., City Health Office, DOH kag Provincial Health Office.
(c) Capiz Aksyon News Center
