Gipasalig sa Department of Agriculture dinhi sa Central Visayas nga wa pay natala ug pabiling luwas sa African Swine Fever (ASF) ang tibook rehiyon -7 .
Ang Regional Director sa DA-7 nga si Salvador Diputado namahayag nga mao ni ang gipaningkamutan karon nga malikayan ang pagsud sa ASF sa rehiyon aron dili maapektohan ang industriya sa pagpamuhi ug baboy human didto sa kaulohan natala ang kaso sa ASF.
Giawhag ni Diputado ang mga hog raiser sa rehiyon nga likayan ang pagpakaon sa ilang mga baboy ug lawog nga singlan ug lamaw , ilabi na ug gigamitan ug karneng baboy ug ubang meat products nga wa ta mahibawo nga adunay ASF ug mao na hinooy makaingon nga matakdan ang ilang binuhi sa maong sakit .
Gitambagan usab ang publiko ilabi na ang mga namuhi ug baboy nga itaho dayon sa mga otoridad kung aduna silay mamatikdan nga nasakit ang ilang mga binuhi aron masusi dayon kini ug kapugngan nga mokatap sa ubang binuhi .
