TOBOSO, NEGROS OCCIDENTAL – (Update) Yara na karon sa istable nga kondisyon ang isa ka iloy nga nagtiro sang iya kaugalingon kag ang retired police nga iya live-in partner nga iya man gintiro kahapon sa banwa sang Toboso.
Ang babayi nakilala kay Merlita Carredo, 52 anyos ang edad, pumuluyo sang Brgy. Poblacion, Toboso samtang ang lalaki naman ginkilala kay retired police Leonilo Garcia, 55 anyos ang edad, pumuluyo man sang amo nga lugar.
Si Garcia ang nagretiro bilang investigator sang Toboso Municipal Police Station.
Base sa imbestigasyon sang Toboso Municipal Police Station, ang insidente natabo mga las 5 kahapon sang kaagahon sa sulod sang balay nga ila gina-istaran.
Suno sa chief of police ang Toboso MPS nga si PC/Insp. Joery Puerto, ang biktima nga lalaki ang nagapaligo sa banyo sang ini siya ang gintiro sang suspek gamit ang 9mm calibre nga armas.
Nakapalagyo pa ang lalaki kag nagpangayo bulig sa malapit nga istasyon sang pulis, apang wala ini nakahibalo nga gintiro man sang babayi ang iya kaugalingon.
Pagpangimon ang ginalantaw nga motibo sang krimen.
Naigo sa iya hita si Leonilo kag padayon nga ginabulong sa Alfredo Marañon, Sr. Memorial District Hospital sa Sagay City samtang ang babayi naman naigo sa iya wala nga dughan kag ginabulong karon sa Corazon Locsin Montelibano Memorial Regional Hospital. /dyHB BACOLOD
