Libre nga gin-abrehan ha publiko an award-winning World War II Traveling Exhibit pinaagi han Philippine Veterans Bank (PVB) ha Robinsons Place Marasbaras Tacloban.
Ine in kaparte han pag-saurog han ika-75 nga annibersaryo han Leyte Gulf Landings kasumpay han National Historical Commission of the Philippines (NHCP), Provincial Government of Leyte ngan City Government of Tacloban.
“The War of the Fathers” an tema han mao nga exhibit nga gin abrehan ha publiko dida han Oktobre 18-tubtub ha Oktobre 25, 2019, Byernes nga adlaw.
Didto makikita an mga vintage WWII pictures, memorabilia, artifact ngan iba-iba nga mensahe kun diin gin papakita an pagtikang han “75th Liberation Trail” dida han Oktobre 20, 1944 ngan nagtapos han pormal nga pag surender ni General Yamachita han Japan dida han Setyembre 3, 1945.
Sumala kan Miguel Angelo Villa-real, Vice- President han PVB, pinaagi han titulo nga “The Fight for our Freedom, panuyuan han mao nga exhibit nga matagan hin pagkilala an mga Filipino WWII Veteran nga naghatag hin importante nga papel agud makab-ot an liberasyon para ha mga igkasi Pilipino. Sugad han gin pakita ni 20-year-old Boy Scout Valeriano Abello nga taga Tolosa, Leyte nga naghatag hin “Cignal” ha mga sundalo han amerika agud dire bombahon an kabaybayunan kun diin damo an mga sibilyan.
Makikita gihapon ha exhibit an diorama han paglanding ha kabaybayunan han Leyte Gulf ni General MacArthur, President Osmeña, General Carlos P. Romulo, General Sutherland ngan CBS correspondent William J. Dunn.
Libre ngan waray bayad an mao nga exhibit para ha ngatanan nga Waraynun.
