Yara sa 900 ka mga baboy sa duha ka mga barangay sa Koronadal City ginpaidalom sa “culling” tungod sa kaso sang ASF.

Malapit sa 900 ka mga baboy ang ginpaidalom sa “culling” sa duha ka mga barangay sa syudad sang Koronadal tungod sa kaso sang African Swine Fever ukon ASF sa isa ka babuyan sa Brgy. Namnama. Ini ang nangin kumpirmasyon ni City Veterinarian Dr. Charlemagne Calo. Samtang ginkumpirmar ni Dr. Calo nga apektado man ang duha ka mga puroks sang Brgy. Rotonda nga malapit sa lugar. Suno kay Dr. Calo 11 ka mga hog raisers ang apektado sa ginpatigayon nila nga “culling”. Pahayag ni Dr. Calo nga nagalab-ot sa masobra 850 ka mga baboy ang ginpaidalom sa “culling” sa isa ka babuyan sa Brgy. Namnama nga may nagpositibo nga baboy sa ASF kag 33 naman sa Purok Pagkakaisa kag Purok Garcia sang Brgy. Rotonda. Sa subong suno kay Dr. Calo kontrolado na ang kaso sang ASF sa syudad, apang nagapadayon ang ila nga monitoring kag surveillance. Ginsiguro naman ni Calo nga may nakahanda nga ayuda ang lokal nga panggobyerno sang Koronadal sa apektado nga mga hog raisers sa duha ka mga barangay. Sa pihak sini suno sa City Veterinarian nagapabilin sa pink zone ang Koronadal tungod indi naman suno pa apektado sang ASF ang bug-os nga syudad.