Yara sa onse ka mga pamilya sa Brgy. Colonggulo sa Surallah nagbakwit tungod sa rido.

Yara sa onse na naman ka mga pamilya sa Brgy. Colonggulo sa banwa sang Surallah South Cotabato ang nagbakwit tungod sa rido ukon away sa tunga sang duha ka mga pamilya.
Ang nasambit nga mga IDP`s ang halin sa mga Sitios sang Lamfugon, Tipat,Datal Samlon kag Tapikong sang Brgy. Colonggulo sa nasambit nga banwa base sa nabaton nga report sang Provincial Disaster Risk Reduction and Management Office South Cotabato.
Sa subong ang onse ka mga pamilya ang yara sa balay sang kapitan sang Brgy. Colonggulo kag padayon ang ila nga assessment suno kay Municipal Disaster Risk Reduction and Management Officer Leonardo Ballon matapos nga ang iban nga bakwit ang nagpadulong sa ila mga himata.
Suno kay Ballon sang Pebrero pa subong nga tuig nag-umpisa ang inaway sa tunga sang duha ka mga pamilya matapos nga gin-ambush ang Sitio leader sang Lamfugon kag bag-o ini nabawian sang kabuhi may pangalan ini nga ginhambal nga amo ang sukton sa natabo sa iya.
Sang Abril 13 subong nga tuig natabo ang pagbalos kag may napatay naman rason nga nahadlok ang mga residente sa lugar.
May-angot sini, suno kay Ballon ginatinguhaan nila sa subong upod ang PNP nga masettle ang konflikto sa tunga sang duha ka mga pamilya.
Ginkumpirmar niya man nga tigayon na sila nga nakahatag sang inisyal nga ayuda sa mga bakwit.
Samtang, ang yara sa masobra 500 ka mga indibidwal nga nagbakwit naman sa Brgy. Ned, Lake Sebu South Cotabato sang Abril 19 tungod man sa rido sa Palimbang Sultan Kudarat ang sarang na makabalik sa ila tagsa ka mga panimalay matapos cleared naman ang area base sa pahayag sang Chief of Police sang Lake Sebu PNP.