Giangkon ni Mayor Demosthenes Arabaca sa lungsod sa Magallanes, Agusan del Norte nga iyang gigamit pag-sweldo sa mga Job Orders (JO) sa munisipyo ang kapin 500,000 pesos nga pundo diin alang unta kini sa Peace and Order sa ilang lungsod.
Kini ang gipahayag ni Mayor Arabaca atol sa interview sa RMN DXBC Butuan subay sa gipasakang kaso ni SB Member Pio Cuta batok kaniya didto sa Office of the Ombudsman.
Ang kaso nga gipasaka batok ni Mayor Arabaca nagsumikad sa illegal nga pag-realign sa nasangpit nga pundo nga walay pagtugot sa Sangguniang Bayan.
Alang ni Mayor Arabaca, maayu ang iyang katuyuan sa pag-realign sa budget tungod kay nalooy siya sa mga JO’s nga walay madawat nga sweldo niadtong higayon nga gisaulog ang Pasko sa buwan sa Disyembre sa nilabyang tuig.
Niya pa usab walay illegal sa iyang gibuhat btungod kay aprobado naman sa Sangguniang Bayan ang ilang tinuig nga budget mao’ng iyang gimandoan ang Municipal Budget Officer nga mangita ug pundo aron isweldo sa mga JO ug maoy nakita ang pundo alang sa Peace and Order ug mao kini ang ilang gikuhaan.
(VC. Mayor 1)
Dugang pa ni Mayor Arabaca nga pamulitika ang ugat-hinungdan niining tanan human wala molampos ang laraw matud pa nga ipapatay siya sa mga kaatbang sa pulitika mao’ng sa pagpasaka ug kaso sa Ombudsman napod ang gihingusgan karon sa iyang mga kritiko.
Gitawag pa sa opisyal ang iyang mga kaatbang ug “desperado”.
Dugtong sa maong balita…
“Preventive suspension” batok ni Mayor Demosthenes Arabaca sa lungsod sa Magallanes, Agusan del Norte maoy tumong ug katuyuan sa pagpasaka ug kaso sa kampo ni SB Member Pio Cuta batok sa Mayor didto sa Office of the Ombudsman.
Kini ang gipasabot ni Atty. Remelio Dulute atol sa gipatawag nga press conference.
Niya pa nga maaplikar lamang ang balaod nga walay mahitabong suspension sa opisyal kung panahon sa eleksyon kana kung aduna desisyon sa korte sa kasong giatubang batok sa nasangpit nga opisyal.
Lahi matud pa ang sitwasyon sa kaso ni Mayor Arabaca tungod kay wala pay desisyon sa ilang gipasaka nga kaso, apan kinahanglan masuspenso siya aron dili niini magamit ang gahum isip Mayor sa pagtabon ug pagtagu sa mga kinahanglang dokumento isip ebidensya sa kaso.
Masaligon si Atty. Dulute nga molampos ang ilang kaso nga gipasaka batok ni Mayor Arabaca gumikan sa mga lig-ong ebidensya nga gunit karon sa ilang kampo.
[image: arabacaaaa.jpg]
