Davao City – Alang ni former Bayan Muna Partylist Representative Neri Colmenares nga lisod gayod malimtan ang kabangis ni bagyong Yolanda nga mibanlas sa Tacloban City resulta daghang kinabuhi ang nakalas.
Bisan og anaa sa kauluhan si Colmenares dihang mikuso-kuso si Yolanda sa Leyte apan bati kaayo niini ang sobra kakusog sa bagyo samot na ang mga taga-Tacloban nga nakatilaw sa storm surge.
Ang kamangtas ni Yolanda niadtong 2013 labing ngil-ad nga kagahapon sa mga tawo sa Leyte nga bisan pa siguro og maniguwang ang mga batan-on didto karon dili gayod mapaspas kini sa ilang panumduman.
Kung aduna ma’y wala makakat-on gikan sa bagyong Yolanda kana dili ang mga biktima kundi mao ang mga anaa sa miaging gobyerno.
Ang kahinay sa pagresponde ug kalangay sa relief goods ug wala mahuman nga pabalay alang sa mga survivors pipila lang sa kapalpakan sa mga opisyal nga kanhi milangkob sa administrasyon ni Pnoy.
Ang sobra kahinay sa miaging kagamhanan nagsambog kini sa grabe nga kawat sa bilyones ka pesos nga idapat unta sa mga naguba nga mga istraktura ug itabang sa mga survivors.
Pikas bahin, wala usab makalikay ang kasamtangan nga gobyerno sa mga batikos sa kanhi kongresista kinsa usa ka abogado tungod sa kakuwang sa warning advisory nga ipaagi sa cellphone sa mga bagyo nga misulod sa nasud sa nakalabay nga mga bulan.
Gi-awhag ni Colmenares si Presidente Rodrigo Duterte nga magtukod og tinuod nga evacuation centers aron kung naa ma’y bagyo dili na mga eskwelahan ang butangan sa mga maapektohan sa kalamidad.
RadyoMaN Joel Viray
