Davao City – Ako nagtoo sa importante ug kritikal kaayong papel nga gihuptan sa kabatan-onan karon sa atong katilingban. Ako believer sa panultihon: “The future belongs to the young, the elders merely show the way.”
Sa maong pagkaagi, ako nagtoo nga hitsas na ang mga proseso ug sistema sama sa pagtunol sa igong kahigayunan ngadto sa youth segment nga aktibong mo-partisipar diha sa kinabuhi ug kalamboan sa nasud-Pilipinas.
Wala akoy nakitang dautan diha sa kamugnaan sa Sangguniang Kabataan kun SK silbing platform, bantawan ug sukaranan sa bililhong partisipasyon sa mga batan-on diha sa pagpauswag sa atong sosyedad.
Mogula lamang ang dautang implikasyon kun tugtan nato nga gamiton sa mga traditional politicians ang SK alang sa ilang dinautang katuyuan sama sa paggawong sa mga SK Representatives diha sa istilo o istratehiya sa pagpamentaha ug pagkawkaw sa kaban sa barangay.
Apan kun giyahan lamang sa systemang minatarong, ang SK mamahimong maligdong nga pundasyon ug entrablado aron ang youth sector makabaton sa igong kahanas ug abilidad sa kun unsaon ang hustong pagpadagan sa ilang organisasyon ingon man pagpatuman sa ilang mga intereses.
Gumikan sa daghanang mga pagkwestion sa integridad sa maong youth group, mas makaayo nga ipakita ngadto sa mga lungsuranon unsay mga undanong reporma or mga kausaban ang ipatuman haron ang SK dili magamit sa mga dautang pulitiko.
Ayuhon nato ang SK, dili nato bungkagon haron ang mga kabatan-onan mas sayo nga ma-expose sa ensaktong kadumalahan ug panggobyerno.
RadyoMaN June Duterte
