Target karon sa Department of Health o DOH Region 10 nga maangkon ang zero casualty alayon sa ilang gipatumang Oplan Iwas Paputok ning panahon sa pasko ug pagsugat sa bag-ong tuig.
Kini ang gibutyag ni DOH Region 10, OIC Chief sa Local Health Support Division, Dr. Dave Mendoza.
Matud ni Dr. Mendoza nga posibleng maangkon ang zero casualty kung dunay kooperasyon sa tanan gikan sa mga lain-laing ahensya sa gobyerno hangtud na sa katawhan sa komunidad.
Gibutyag usab ni Dr. Mendoza nga sa milabayng tuig niabot sa 62% ang pag-ubos sa fire crackers related injuries kay gikan sa kapin kon kulang 28 ka kaso sa 2016 nahimo na lamang kining napulo sa 2017.
Padayon ang paningkamot sa DOH nga mapaubsan ang maong mga kaso sa mga nabuthan pinaagi sa tabang sa mga ginikanan nga ma edukar ang mga anak nga dili mogamit sa pabuto, suporta gikan sa LGUs, tabang sa katawhan ug pagka-andam sa mga ospital aron malikayan nga dunay mamatay kung dunay mabuthan sa pabuto.
Gipahinumdum usab ni Dr. Mendoza ang ka delikado sa piccolo diin kini usa ka gamay nga pabuto apan dako og epekto nga maoy nag-una gihapong hinungdan sa mga injuries.
