DIPOLOG CITY-Daling girespondehan sa ka bomberohan ning syudad sa Dipolog ang natigayon nga pag-ulbo sa kalayo didto sa may Purok Green valley, Brgy. Turno sakop ning dakbayan sa Dipolog mga 5:40PM.
Nagsugod ang kalayo gikan sa gidauban nga basura kilid mismo sa panimalay ni Marivic Abaya.
Butyag pa ni Marivic, nga wala siya magdahom nga ingon niadto kadali ang pagkuyamang sa kalayo tungod kay sa dihang iyang gibiyaan aron mag tak-ang ug nilung-ag pipila lang ka minuto mao nalang ang misugat sa iyang panan-aw nga nag sayaw-sayaw na ang kalayo kilid sa iyang balay.
Gisulayan pa nila ug sabya sa tubig sa pamasin nga mapalong ang kalayo apan wala kini na dala, swerte nga daling naabot ang bombero.
Nabalaka usab ang mga nag abang sa Arlyn s Apartment niadtong higayona tungod kay hapit miabot ang kalayo sa ilang giabangan.
Butyag pa sa taga BFP-Dipolog laya na ang sagbot sa ilawom hinungdan nga naduktan sa kalayo bisan paman lunhaw ang ibabaw niini.
Kung naapil ug kasunog ang Arlyns Apartment posibleng mag atubang si Marivic sa kalapasan sa R.A 9003 Ecological Solid Management Act, Sec. 48(3).
Pero kay dali kining napalong sa ka bomberohan ang kalayo nga milungtad sa halos 20 minutos, gipamulta nalang kini sa nahimong kalapasan sa city ordinance no. 123.
