General Santos City—usa patay samtang tulo ang angol sa nahitabong disgrasya sa kadalanan sa may Fil-am Road, Barangay Tambler, General Santos City, alas 11:30 ang takna sa gabie niadtong Domingo, July 30, 2017.
Biktimang namatay nailhang si Hordan Ondap, legal age, residenti sa Zone 8, Upper Banualan, Barangay Tambler, samtang angol ang biktimang si Gino Bernalder, 26, residenti sa Prk. Banualan, Barangay Tambler.
Nakaangkon usab ug samad ug bun-og sa nagkandaiyang parti sa kalawasan si Roderick Solana Ballar, residenti sa Prk. 5, Intake, Barangay Mabuhay, Gensan driver sa Honda RS nga dunay plate number MO-1720 ug Marvin Abofera Marcelino, NUP sa Police Station 7; driver sa Honda XRM nga nagtangag ug plate number PDL 3264.
Sa inisyal nga imbistigasyon sa Traffic Management Unit (TMU) nasuta nga padulong sa dereksyon sa Police Station 5 ang duha ka motorsiklo nag-una niini ang gimanihuan ni Ballar iyang nabanggaan ang nitabok sa dalan nga silang si Ondap ug Bernalder .
Tungod sa impact nabalintong ang motorsiklo ni Ballar apil na ang gimanihuang motorsiklo sa NUP nga si Marcelino kansa nagsunod ra sa nahisgutan.
Ang duha ka mga pedestrian nga nabanggaan ang nakaangkon usab ug mga samad apan mas nagrabihan si Ondap gumikan sa kusog nga pagbunal sa lawas niini sa gahing butang.
Gidala pa sa ospital ang biktima apan gideklara kining dead on arrival. Samtang si Bernalder naconfine karon sa Dr. Jorge Royeca Hospital gumikan sa mga samad nga naangkon.
Migula usab sa imbistigasyon sa TMU nga susamang nanimaho ug ilimnong makahubog ang duha ka mga driver kansa gituohang hinungdan nga wala nabantayan sa nauna ang duha ka biktimang mitabok sa dalan.
Sa karonanaa na sa kustudiya sa TMU ang duha ka mga motorsiklo samtang padayon pa ang imbistigasyon sa kaso.
