General Santos City—Patay ang usa ka ginang samtang angol ang anak niini human nabanggaan sa usa ka pick-up ang gisakyan nilang motorsiklo sa may National Highway nga sakop sa Ondok Gawan, Barangay Apopong, Gensan alas 6:05 sa gabie.
Giila ang namatay nga si Delia Dando Cagampang, 58 anyos, residente sa Purok Magsaysay, Polomolok, South Cotabato. Samtang ang samdan mao si Glacier Joy Cagampang, 22 anyos kansa maoy driver sa motorsiklo nga Kawasaki Bajah with side car.
Subay sa blotter report sa Traffic Management Unit (TMU)-Gensan, parehong gisubay sa Motorsiklo sa mga biktima ug sa Toyota Pick-up ang dalan sa may Ondok Gawan, Barangay Apopong padulong sa Sinawal area, pag-abot sa Pendatun, National Highway Road, gipakusgan sa wala mailhing driver sa Toyota Pick-up ang iyang sakyanan nga miresulta sa pagbangga niini sa likod nga bahin sa motorsiklo.
Tungod sa kusog nga impact, nalagpot ang duha ka mga biktima diin ang ginang nga si Delia maoy nagrabihan gumikan sa iyang mga samad sa ulo ug sa kalawasan. Samtang ang anak niini nakaangkon usab ug samad sa ulo ug sa lawas.
Daling gidala sa Dr. Jorge P. Royeca Hospital si Delia apan gideklara kining dead on arrival, samtang ang anak niini nagpaalim nalang sa mga samad nga naangkon.
Ang duha ka mga sakyanan ang gidala sa buhatan sa Traffic Management Unit, samtang nagpadayon pa karon ang imbistigasyon sa kapulisan kalabutan sa maong insidente.
