Nakarekord na sang 102 ka kaso sang balatian nga dengue ang South Cotabato halin Enero 1 tubtob petsa 20 subong nga tuig base sa datos sang Integrated Provincial Health Office.
Apang ang nasambit nga kaso ang manubo sang 64.3 percent kumparar sang nagligad nga tuig sa kapareho nga period.
Kadam-an naman sa nangin biktima ang yara sa edad nga 0-10-anyos kag sa 102 ka kaso kadam-an ang mga babaye.
Nagpanguna naman sa may pagtaas sa kaso ang syudad sang Koronadal nga may 24, ginasundan sang T`boli nga may 18, Tupi-17 , Polomolok – 12, Surallah -9, Banga-6,Lake Sebu – 5, tig-apat naman ang kaso sang Tampakan kag Tantangan, Norala – 2 kag 1 naman ang narekord nga kaso sang balatian nga dengue sa banwa sang Sto. Niño.
Samtang ang banwa sang Lake Sebu kag T`boli ang halos masobra syento porsyento ang ginsaka sang ila nga kaso kumparar sang nagligad nga tuig sa kapareho nga period.
Suno kay Sir Jose Baroquillo, Mosquito Borne Disease Coordinator sang Provincial Health Office sang South Cotabato may-yara naman sila sang intervention nga ginhimo agud nga makontrol ang pagsaka sang kaso sang balatian nga dengue sa banwa sang Lake Sebu kag T`boli.
