Patay nang nadala sa St. Paul Hospital sa Tagoloan, Misamis Oriental ang 13 anyos nga estudyante human maligsan sa trailer truck sa Barangay Sugbongcogon, Tagoloan mga alas 3:20 kagahapon sa hapon.
Ang biktima nailang si Lourdes Marie Taña Acaso, taga Zone 6, Barangay Sugbongcogon, Tagoloan ug estudyante sa Tagoloan High School.
Matud ni Police Staff Sergeant Val Albert Velasco, Traffic investigator sa Tagoloan Municipal Police Station nga ang driver sa trailer truck mao si Marvin Lonzaga Magallanes, 24 anyos, taga Ala e, Manolo Fortich, Bukidnon.
Gibutyag ni Police Staff Sergeant Velasco nga nalabyan sa trailer truck ang upat ka estudyante nga nagbaklay sa Sugbongcogon Barangay road apan pag-abot sa unahan tungod kay gi-ayo ang maong dalan nihunong una kini kay stop pa ang linya niini ug sa pag Go wala na nabantayan nga naa na diay nakapidpid sa iyang trailer truck sa likod nga ligid ang maong biktima.
Posible matud pang naligyas ang biktima busa nalatayan ang ulo niini ug wala makabantay ang driver nga naa na diay siyay naligsan.
Ang maong trailer truck gipanag-iyahan sa usa ka Dustine Borja ug gi-atiman na ang biktima.
Samtang sa pagkakaron, detinado na sa Tagoloan Municipal Police Station si Magallanes ug posibleng mag-atubang sa kasong reckless imprudence resulting to homicide.
